Ade Sutrawan (46) warga Desa Sungai Nipah Kabupaten Kotabaru ditamuakan Tim SAR Gabungan sudah kada bahinak lagi, Jumahat (27/10/23) siang.
Kada ga gampangan, ma anam hari hilang dicari i imbah tagugur ka laut, maka nya sakali tatamu harau habis umur sidin nya.
Sidin dicari i imbah buhan nya tatamu parahu sidin hanyut manyurangan, sintar banyala an tapi kadada ikung nya, puang kadada urangnya pada Sabtu (21/10/23).
Imbah buhan Tim SAR Gabungan bahimat bacarian, mahayau laut kesana kamari, sambil maliat kancang arus, arah angin, akhirnya pas ma anam hari akhirnya tatamu jua.
"Akhirnya, imbah hayau sana sini bacarian salawas anam hari, sidin nang hilang tagugur ka laut tatamu jua. Langsung ai kami bawa bulik ka Puskesmas Desa Sei Nipah," ujar Koordinator Pos SAR Kotabaru, Adi Maulana nang mamimpin buhannya bacarian.
Maraga sudah tatamu, ujar Al Amrad S. Sos sabagai Kepala Kantor Pencarian dan Pertolongan Banjarmasin, maka kami ucapkan terimakasih kasih wan samunya an nang umpat manggani i mancari.
"Kami ngini kada kurang surung kurang sintak pang madahi buhan nya nang katuju bacari iwak di laut, ba ingat, basangu palampung atawa napa kah nang kawa maulah timbul bila bila parahu karam atawa tagugur ka laut, tapi nang ngaran musibah kada kawa ai dihindari," ujarnya. (Rel)
Tidak ada komentar:
Posting Komentar
Silakan berkomentar tapi jangan bernuansa SARA.