Ujar nang kaka, sawaktu hidupnya aruwah SR (29) laning kabanyakan pikiran, mana hutang batuyuk lawan jua ditinggalakan bini madam.
Ini pas jasad adingnya ditamuakan tatangga sabalah rumahnya, pas rahatan mati tagantung babunuh diri manyurangan dalam rumah, Ahad (15/10/23).
Semula jasad aruwah SR ditamuakan si M. Ainul Musyafa pas mancium bau kada nyaman, bau haruk haruk kaya bau bangkai. Imbah tu dicari i nya higa mahiga rumahnya tapi kada tatamu.
Kada lawas tacium pulang bau haruk ngitu, lalu dicari i nya pulang diwadah tetangganya, imbah dihintipnya liwat kaca lalungkang, taitihi tetangganya ngitu tagantung kada sing garakan.
Lalu ai tumbar di intangan Perumahan KPI RT 11 Desa Kersik Putih Batulicin ngini, kalu ada warganya nang mati kada ketahuan, tagantung ha pulang.
Imbah dilapurakan ka Pulisi Polsek Batulicin, aruwah mati babunuh diri surangan jar, kadada ikhwal nang lain, murni babunuh diri.
"Ada pang batamu aruwah maniga hari nang lalu, imbah tu kada lagi," ujar M. Ainul Musyafa takajut tatangganya mati bakajutan sambil meninggal surat nang isinya mambari maras banar bunyinya.
Kalawasan dah unda ni sasat, handak mati haja rasanya, tapi unda handak mati kaya urang jua nang baiman. Ba adu kamana ba adu, kadada nang paduli wan baratnya hidup kujalani. Jadi baik mati haja dah mun kaya ini, padahal unda handak mati baiman tapi itu tadi pang kadada nang mamadahi. Unda sudah jua ba usaha, tapi tatapai laning lalat tabulik mauk sasat surangan.
Bagi nang membaca surat kuasa ngini, ba ingat lah, hanya iman nang kuat maulah hidup nyaman. Biar banyak ba harta gin mun kurang kuat iman tatapai hidup kada tanang. Unda ni sudah pasti masuk Naraka, bisa ai kada masuk surga. Baharta banyak gin kada manjamin jua masuk surga, apalagi kurang kuat iman.
Imbah dipariksa ulih buhan Polsek Batulicin Polres Tanah Bumbu, jasad aruwah akhirnya dimakamkan ulih pihak kulawarga di TPU Desa Sarigadung Kecamatan Simpang Empat. (Rel)
Tidak ada komentar:
Posting Komentar
Silakan berkomentar tapi jangan bernuansa SARA.